دواير
بنلف فـ دواير
و الدنيا تلف بينا
و دايماً ننتهي
لمطرح مابتدينا
طيور الفجر تايهة
فـ عتمة المدينة
بـتـدور
~~~
ما بنكتبش الرسايل
ما بننتظرش رد
لا حد فـ يوم سمعنا
و لا بنسمع حد
طيور العُمر تايهة
فـ عتمة المدينة بتدور
~~~
ساكنين فـ عالم يعشق الخطر
فيه الطيور تهرب من الشجر
و تهرب النجوم من القمر
و تهرب الوجوه من الصور
بنلف فـ دواير ندور ع الأمان
و نلاقينا رجعنا تاني لنفس المكان
ندور ندور ندور
~~~
نحلم و نحلم
بالحياة المُفرِحة
و أتاري أحلامنا بلا أجنحة
بلا أجنحة
بلا أجنحة
ندور ندور ندور
بجناح حزين مكسور
ساعات نشوف فـ العتمة
و ساعات نتوه فـ النور
ساعات عيوننا بالأسى
تفرح
و ساعات في ساعة الفرح
منوّحة
